ପରବର୍ତ୍ତୀ ସମୟରେ ଏହା ଉତ୍ତର-ପଶ୍ଚିମ ଦିଗକୁ ଗତି କରି ନଭେମ୍ବର ୧୪ ତାରିଖ ସୁଦ୍ଧା ସୁଦୃଶ୍ୟ ଲଘୁଚାପ ଏବଂ ୧୫ ତାରିଖ ବେଳକୁ ଅବପାତର ରୂପ ନେଇପାରେ। ଏହି ସମ୍ଭାବ୍ୟ ପାଣିପାଗ ପରିବର୍ତ୍ତନକୁ ନେଇ ଓଡ଼ିଶାରେ ବର୍ଷା ଆଶଙ୍କା ବଢ଼ିଛି।
ପାଣିପାଗ ଆକଳନ ଅନୁସାରେ, ନଭେମ୍ବର ୧୪ରୁ ୧୬ ତାରିଖ ମଧ୍ୟରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ପବନର ବେଗ ଘଣ୍ଟାପ୍ରତି ୪୦ରୁ ୫୦ କିଲୋମିଟର ରହିପାରେ। ଏହା ସହ ପବନର ଝଟକା ଘଣ୍ଟାପ୍ରତି ୬୦ କିଲୋମିଟର ପର୍ଯ୍ୟନ୍ତ ପହଞ୍ଚିବା ଆଶଙ୍କା ରହିଛି। ଅନ୍ୟପଟେ ଏହି ପାଣିପାଗ ପ୍ରଣାଳୀର ପ୍ରଭାବରେ ନଭେମ୍ବର ୧୭ରୁ ୨୦ ତାରିଖ ମଧ୍ୟରେ ଉପକୂଳ ଓଡ଼ିଶାର ବିଭିନ୍ନ ଜିଲ୍ଲାରେ ବର୍ଷା ହୋଇପାରେ।
ଏହି ସମ୍ଭାବ୍ୟ ବର୍ଷା ଖବର ଚାଷୀଙ୍କ ଚିନ୍ତା ବଢ଼ାଇଛି। କାରଣ ଏବେ ରାଜ୍ୟର ବିଭିନ୍ନ ଅଞ୍ଚଳରେ ଧାନ ଅମଳ କାର୍ଯ୍ୟ ଜୋରସୋରରେ ଚାଲିଛି। ଚାଷୀମାନେ ବିଲରୁ ପାଚିଲା ଧାନ କାଟି ଖଳାକୁ ଆଣୁଥିବା ବେଳେ ଲଘୁଚାପ ଜନିତ ବର୍ଷା ଆଶଙ୍କା ସେମାନଙ୍କ ପାଇଁ ନୂଆ ସମସ୍ୟା ସୃଷ୍ଟି କରିଛି। ବିଶେଷକରି ଗଞ୍ଜାମ, ପୁରୀ ଓ ଜଗତସିଂହପୁର ଭଳି ଉପକୂଳ ଜିଲ୍ଲାର ଚାଷୀମାନେ ଧାନ ଅମଳ ଓ ସଂରକ୍ଷଣକୁ ନେଇ ଚିନ୍ତିତ ଅଛନ୍ତି।
ଯଦି ଧାନ କାଟିବା ପରେ ବର୍ଷା ହୁଏ, ତେବେ ଖଳାରେ ଥିବା ଧାନ ଭିଜିବା ସହ ଶୁଖାଇବା ଓ ସଂରକ୍ଷଣ କାର୍ଯ୍ୟରେ ସମସ୍ୟା ଦେଖାଦେଇପାରେ। ଏହା ଧାନର ଗୁଣବତ୍ତା ଓ ଚାଷୀଙ୍କ ଆୟ ଉପରେ ମଧ୍ୟ ପ୍ରଭାବ ପକାଇବା ଆଶଙ୍କା ରହିଛି। ତେଣୁ ପାଣିପାଗର ପରିବର୍ତ୍ତନ ଉପରେ ନଜର ରଖିବା ସହ ଅମଳ ହୋଇଥିବା ଧାନକୁ ସୁରକ୍ଷିତ ଓ ଶୁଖିଲା ସ୍ଥାନରେ ରଖିବା ଚାଷୀଙ୍କ ପାଇଁ ଗୁରୁତ୍ୱପୂର୍ଣ୍ଣ ହୋଇପଡ଼ିଛି।
ସେପଟେ ଲଘୁଚାପ ଜନିତ ବର୍ଷା ଓ ମେଘୁଆ ପାଗ କମିବା ପରେ ରାଜ୍ୟକୁ ଉତ୍ତର ସାମୁଦ୍ରିକ ପବନ ବହିବା ଆରମ୍ଭ ହୋଇପାରେ। ଏହାର ପ୍ରଭାବରେ ନଭେମ୍ବର ଶେଷ ସପ୍ତାହ ଆଡ଼କୁ ରାତିର ତାପମାତ୍ରା ହ୍ରାସ ପାଇବା ସହ ଶୀତର ପ୍ରକୋପ ବଢ଼ିବ ବୋଲି ପାଣିପାଗ ବିଭାଗର ଆକଳନ ରହିଛି।
ତେଣୁ ଏବେ ସମସ୍ତଙ୍କ ନଜର ବଙ୍ଗୋପସାଗରରେ ସୃଷ୍ଟି ହେଉଥିବା ଲଘୁଚାପ ଉପରେ। ଏହାର ଗତିପଥ ଓ ପ୍ରଭାବ ଆଗାମୀ ଦିନରେ କିପରି ରହିବ, ତାହା ଉପରେ ନିର୍ଭର କରିବ ଓଡ଼ିଶାର ପାଣିପାଗ। ଏପଟେ ବର୍ଷା ଆଶଙ୍କା ମଧ୍ୟରେ ଧାନ ଅମଳ କରୁଥିବା ଚାଷୀଙ୍କ ଚିନ୍ତା ଏବେ ବଢ଼ିଯାଇଛି।
