ଆସନ୍ତାକାଲିଠାରୁ ଦିଲ୍ଲୀ-ଏନସିଆର ଅଞ୍ଚଳରେ କ୍ଷୀର ଦାମ୍ ଲିଟର ପିଛା ୨ ଟଙ୍କାରୁ ୪ ଟଙ୍କା ପର୍ଯ୍ୟନ୍ତ ବଢ଼ିବ। ଏହି ନୂଆ ଦର ଲାଗୁ ହେବା ପରେ ଗ୍ରାହକଙ୍କ ଦୈନନ୍ଦିନ ଖର୍ଚ୍ଚ ସହ ମାସିକ ଘରୋଇ ବଜେଟ୍ ଉପରେ ମଧ୍ୟ ପ୍ରଭାବ ପଡ଼ିବ।
କମ୍ପାନୀର କହିବା ଅନୁସାରେ, ଚାଷୀଙ୍କଠାରୁ କ୍ଷୀର ସଂଗ୍ରହ କରିବା ଖର୍ଚ୍ଚ ବୃଦ୍ଧି ପାଇଛି। ଏଥିସହ ଦୁଗ୍ଧ ଉତ୍ପାଦନ ଓ ଯୋଗାଣ ସମ୍ବନ୍ଧୀୟ ଖର୍ଚ୍ଚ ବଢ଼ିବାରୁ କ୍ଷୀର ଦର ବୃଦ୍ଧି କରିବାକୁ ପଡ଼ିଛି। ମଦର ଡେରୀ କ୍ଷୀର ବିକ୍ରିରୁ ମିଳୁଥିବା ଆୟର ପ୍ରାୟ ୭୫ରୁ ୮୦ ପ୍ରତିଶତ ଦୁଗ୍ଧ ଉତ୍ପାଦନକାରୀ ଚାଷୀଙ୍କୁ ପ୍ରଦାନ କରିଥାଏ। ତେଣୁ ଚାଷୀଙ୍କଠାରୁ କ୍ଷୀର ସଂଗ୍ରହ ଖର୍ଚ୍ଚ ବଢ଼ିବା ମଧ୍ୟ ଏହି ଦର ବୃଦ୍ଧିର ଏକ ପ୍ରମୁଖ କାରଣ ବୋଲି କୁହାଯାଇଛି।
ନୂଆ ଦର ଅନୁସାରେ, ଟୋଣ୍ଡ ଖୋଲା କ୍ଷୀରର ଦାମ୍ ଲିଟର ପିଛା ୫୮ ଟଙ୍କାରୁ ବଢ଼ି ୬୦ ଟଙ୍କା ହେବ। ସେହିପରି ଫୁଲ୍ କ୍ରିମ୍ ପ୍ୟାକେଟ୍ କ୍ଷୀରର ଦାମ୍ ୭୨ ଟଙ୍କାରୁ ବୃଦ୍ଧି ପାଇ ୭୬ ଟଙ୍କା ହେବ। ଟୋଣ୍ଡ ପ୍ୟାକେଟ୍ କ୍ଷୀର ଲିଟର ପିଛା ୬୦ ଟଙ୍କାରୁ ୬୨ ଟଙ୍କାକୁ ବଢ଼ିବ। ଡବଲ୍ ଟୋଣ୍ଡ କ୍ଷୀରର ଦାମ୍ ୫୪ ଟଙ୍କାରୁ ୫୬ ଟଙ୍କା ହେବ। ଅନ୍ୟପଟେ ଗାଈ କ୍ଷୀରର ଦାମ୍ ଲିଟର ପିଛା ୬୨ ଟଙ୍କାରୁ ବୃଦ୍ଧି ପାଇ ୬୫ ଟଙ୍କା ହେବ।
ଉଲ୍ଲେଖଯୋଗ୍ୟ, ଚଳିତ ବର୍ଷ ମେ' ୧୪ ତାରିଖରେ ମଧ୍ୟ ମଦର ଡେରୀ ଦିଲ୍ଲୀ-ଏନସିଆର ଅଞ୍ଚଳରେ କ୍ଷୀର ଦର ଲିଟର ପିଛା ୨ ଟଙ୍କା ବୃଦ୍ଧି କରିଥିଲା। ଏବେ ପୁଣିଥରେ ଦାମ୍ ବଢ଼ିବା ନିଷ୍ପତ୍ତି ଗ୍ରାହକଙ୍କ ଚିନ୍ତା ବଢ଼ାଇଛି। କାରଣ କ୍ଷୀର ପ୍ରତ୍ୟେକ ପରିବାରର ଏକ ନିତିଦିନିଆ ଆବଶ୍ୟକତା। ଚା', କଫି, ପିଲାଙ୍କ ପୁଷ୍ଟିକର ଖାଦ୍ୟ ଏବଂ ଘରର ବିଭିନ୍ନ ଖାଦ୍ୟ ପ୍ରସ୍ତୁତିରେ କ୍ଷୀରର ବ୍ୟବହାର ହୋଇଥାଏ। ତେଣୁ ଲିଟର ପିଛା ୨ରୁ ୪ ଟଙ୍କା ବୃଦ୍ଧି ହେଲେ ମଧ୍ୟ ମାସ ଶେଷରେ ଏହାର ପ୍ରଭାବ ଘରୋଇ ବଜେଟ୍ ଉପରେ ପଡ଼ିବା ସ୍ୱାଭାବିକ।
ଏବେ ଗ୍ରାହକଙ୍କ ମନରେ ପ୍ରଶ୍ନ, ଆଗକୁ ଅନ୍ୟ ଦୁଗ୍ଧ କମ୍ପାନୀଗୁଡ଼ିକ ମଧ୍ୟ କ୍ଷୀର ଦର ବଢ଼ାଇବେ କି? ତେବେ ମଦର ଡେରୀର ଏହି ନିଷ୍ପତ୍ତି କେବଳ ଦିଲ୍ଲୀ-ଏନସିଆର ଅଞ୍ଚଳ ପାଇଁ ଲାଗୁ ହେଉଥିବାରୁ ଅନ୍ୟ ଅଞ୍ଚଳର ଗ୍ରାହକଙ୍କୁ ନିଜ ଅଞ୍ଚଳର ନୂଆ ଦର ସମ୍ପର୍କରେ ଅଲଗା ଭାବେ ସୂଚନା ନେବା ଆବଶ୍ୟକ।
